فقرة ( انسان مثقف شاعر ) اعداد الشاعر فارس الشباني

فقرة ( انسان مثقف شاعر )
راح تكون كل اربعاء وأحد يومين بالاسبوع
اليوم نبدأ من اولايتي طبعا من حقي انحاز للديوانية
لانها انجبت الهرم الشعري الكبير الاستاذ العملاق
( علي الشباني )
…………
اليوم راح يشارك ويانه شاعر شاب مبدع من مواليد الديوانيه
عام 1995 كتب الشعر الفعلي عام 2014
من ناحبة الشنافيه
الشاعر الشاب المبدع مهدي فالح النداوي
اليوم وهو يرثي عملاق القصيدة الكبير العم علي الشباني
بقصيدتهِ التي تقول
…… .
شفت حزنك اتبدا شراع
وقريت الوانك وجست الصهيل امتاع
الصهيل امتاع لأيام الروازين الغفت بيد الشمس معضد
لايام التجي الظلمة بضفايرها وتجيس الدم غنة ومرود
غنة ومرود واصابع من ورا اظنونك تلم حزنك
تلم من الشمس مكدار ساجيتين وتفيض على طول اسمك
على طول اسمك تمد الوحشة اصابعها وتجيبك من رجيف الدم
حزن نجمة فراتية برجيف الدم
حزن يشتعل بالظلمة على اصابيعك اغاني وساجية وموال
حزن يصهل على جروف الليالي هلال
حزن يتناك ليلية تجي بروج الضوا شراعين
الشمس نزعت معاضدها وطفت غاد على وجه الطين
على وجه الطين وجه الدم
وجه الدم يسافر ساجية ويسبگ جناح الضي
يجي بدمك زراك المي
يشب دمك منارة تغني للدم اليساري اغنية شكرة
تغني للطين العراقي اغنية شكرة
تغني ويطك المطر حنة وضفاير
وتكبر ازغار الشريعة وكل ضفيرة تجيب شاعر
كل ضفيرة تجيس حزنك تكبر ولاية فراتية حزينة
تكبر اكميرة حزينة
يشتعل دمك ضمة اجناحين بر وتنطفي طويرة حزينة
تنطفي قداس مخمور وشعر صوفي وغناوي
تفك شبابيجك غريبة
أيشباجك محطات استراحة لكل تعب خيال ضاوي
لكل جرف يتناك تبجيله
وتغنيله شعر وطيور بيض
فيض مخمور بنهد مجنون فيض
فيض وانزل من صليب الدم ضفاير سابحة بضي الكمر
وشاربة من الضلمة لون
وبالظنون خيول مذعورة تجيبك بالظنون
مهدي فليح النداوي


______________

فقرة ( انسان مثقف شاعر )
الفقرة الثانية ليوم الاحد المصادف 2020/1/12
شاعر مبدع جدا صغير في العمر كبير بنتاجه
من المدائن جسر ديالى بغداد
من مواليد 2000
كتب الشعر الفعلي عام 2017
انا وانتم وما خطه
الشاعر
مصطفى النوري
………………… ..
(غني غني)
غني غني!!!
ولون أوراق ألدفاتر
صوت #حبري ...
وشخبط ألدنيا أنتظار؟
وألبس ألسكتة شعار؟
وعيش #خمري !!
أركض ألبيبان نومك...
ودكدك أحلام #ألتريدة !
تبجي ألمن؟؟
هية موجودة من أمس
غبشة أخبار #ألجريدة ...
أركض أركض....
وسافر بوكفت #قطارك !!
ودير بالك تصفنلهة
لا تتاني"
ألكلشي واهس
واهس ألصفنة #أنتظارك "
أفتح ألصفحة ألتلجمك!!!
وأنشر أجروح أليالي!!
وتاني تاني.....
وأنطي أعجاب #ألقرارك
علق بسكتة دمعتك
وشارك ألضحكة #أنتصار"
هية مو شغلة متسوة؟
ويلا عدي؟
وروح نام؟
ألشغلة اكبر ؟؟؟
ألشغلة #ثار ...
أضحك أضحك....
دنيا ما تسواش #غيضة"
هية مو صوج أليالي؟؟
صوج وادمنة #ألمريضة"
ألبحجة أتعالج وحدتك
باكت ألهفة أنتقام!!
وأنت #تدري!!!!
يلا #عدي...
أبقى جوعان ويعوزك...
أمشي أمشي....
وأجزي كل شجرة #ألتجهبك؟
وأحذر ألتفاح خايب!!
هذا كلش راح #أيتعبك...
ولملم أخشاب ألسفينة!!
وروح غاااد؟
وأبحر بعيشة #ضميرك"
وأعقر ألدمعة عطاء
يعني قربان #ألاميرك"
وزاعل ألقمصان كلهة؟
ردلي شوفي
أكتب أعلة ألبير مات...
وأصلب أضنون ألمناطر..
هذا حزني
صيح عالي؟
أتعلك أبالي #صليب"
وأبني كعبة مستحاتك ..
وشيد ألناسك حضارة!!
وسوي للتمثال #جيب"
غني غني ...
وأبقى غني ...
عيش وي روحك #حبيب"
مصطفى النوري

_________________

فقرة ( انسان مثقف شاعر )
لليوم الثالث يوم الأربعاء المصادف 2020/1/15
شاعر شاب مبدع ومحترف جدا من مواليد 1995 من النجف الأشرف
حي السلام
كتب الشعر الفعلي عام 2017
انا وانتم والشاعر الشاب والمبدع
منتظر حامد البرشاوي
السجين
………… ..
جيب صدري
، سجن لهفه
وحچي فاجر باللسان
والسنون سياج عفه
سافرت غبشة اعله كشخه
وچان هندامي نضيف
وليلي چله
وماستبرد
وماهتم ، چان لفافي شمس
وحايطي الي چانت فطوره ابتسامه
ودعيته ، استغربت رده سكوت
وحيل بارد
حلگه مسدود بخيوط العنكبوت
الله اكبر
سفره حته الخيط بيها إلگيته ضدي
راد يثأر لابن عمه
شاف خيط الأمل مذبوح اعله ايدي
وگتله بعض اثم ،
بموته كل كتر بيه
سكنّته عثه ومشه بروحة الثلم
امنيتي ابن مريم يجيني حته اوضحله الحقيقه
والغريبه
، التراب چفوف حايط
وگام حايطنه استغل الريح مد ايده وحضني
وياكبر ذيچ الندامه من عفت ديرة مشابگ
حته حاطيها يحبني
وكلشي اسود
بسفرة متلونه ابعرضها
حته رزة الباب من فتحتها صاحت
رادت اتگعد ابوي
وابتديت
وادري درب الألف لهفه
يبتدي بخطوة الغربه
واني اعرف كل غريب يعيش دوامة ملامه
ويه كل سنتيم من خطوات دربه
و واگفه امي
ونايمه طاسة البيت
وطاسة البيت إبسُبات
شعجب مافززها ماي
راكب الوهواس راسي
چا شنو ذوله نسوني
وخوفي لاسبعه يجني
خوفي لا وتصير حصه
وحده منهن افتراسي
وقررت لازم اشوف
وألتفت ،
ولگيت چف امي إعلى من الطاسة كلش
وشنهي ماي
بدت إحروف الله يهديك وتردلي
بدمع خيط إحروره واصل حد گفاي
وسافرت وتركت كلشي
على آلة نقل غرفه
وسچه شباچ الغرفتي
وليلها مزاعل الگمرة
بسفرتي الحرية محجر
غرفة هندس ، وليش هندس
واني لفافي شمس
وجاسني إخويط البرد
تلمست لفافي ماكو
وعرفتها
لگيت ذرعان امي لفاف برگبتي
والدفو من الدموع
والمحنه تراب حايط
وروحي جوعانه ندم
ويمها بس ماعون هم
واني شباچي سواليفه دفن
وگلت الله يعين زينب
شثگله شگبان الوداع
وصبعي شابگ جيب صدري
ريح وبحضن الشراع
وجيب صدري سجن چان
لصورة بيه چفوف ابوي
شايله إعلاليگ حنيه ومحنه
وطلعتها وطاحت اعله الگاع ورقه
تلمستها
واني ادري ،
چفوف اصابيعي يشوفن حچي امي
ومن قريته حچي "للنواب" گايل
ردت اگلك والتهينه وفاركتني
ردت اكلك عودتني ..
منتظر حامد البرشاوي
_______________

فقرة ( انسان مثقف شاعر )
لليوم الرابع يوم الاحد المصادف 2020/1/19
انا وانتم مع شاعر شاب ولد في الغراف محافظة الناصرية
مواليد 1996 صاغ من سمار ارضهِ سماره
وكتب الشعر الفعلي عام 2018
الشاعر الشاب والمبدع
السيد ضياء الصافي
……………… ..

انته وينك
انته انه بنص درابين المشوفه
انته كاهن فوك قربان او مناره
وانه معبد جمر شوف بحجي ناره
وانته بيت الله بياضه
وانه بيت الله بسواد كلوب اليطوفون
بعيون السكاره
وانته شاره حالفين مانعوفك
وانه تنور او يدخنله ابجكاره
من اجيتك جدحت اعيونك هلاهل
وخضر البيدر غرام او دوت ناره
من كلتلي
اوكف
اوكف
اوسحكت ادموع الحنين اعله الملامح
اوهيه شاره
طموا اعيون المحابس عاندتهم
طلعت العين بكفاهه
وشربوا اعيون السراكي
او اسكتوا كل باب يحجي بالنفاهه
حته صوت الخشبه مزعج
حته جف الفركه يعرك
يمتة تفرج
حته حايطنه الجزعني
الجنت اتجي اعليه يلهج
مااريدك روح دورلك ونيس
كمت ادور بالقصايد بلكي بيت ايهود الروح اويجيس

او تبقه شاره
شيخت حته المناير
كبلت حته الجوامع
هيه رازونة صلاة
فتّحت بوب الولايه اعله المكابر
اوروحي نتگت حلم مدري
او هيه روح...
الروح محبوبة غريب
والمهر يكطع مسافه
والدرب ريحه حرامي
والسلف جامع ملاهي
منين ما تشهك مجافه
دخنت جدم الجكاير
او صاحت الريه عوافي
بكل منصات الشعر......
وردت اسولف
وتعبت اجدامي اونسيتك انته يمي
جدمي معمي طافك اتلاثين مره
وانته مو نفسك حبيبي
انته صايغلي نحيبي
ابمعضد اجفوف التجافي
وانته غافي وانه مشط احديثه لمن دوريتك
مالكيتك
وانته ابيض يالبن معدان صيتك
ياوكح..
تمشي انته بيه
هيجي ممشه زلوف سمره ماتبين
شنهو نيتك...
وانه اتلمس تراجي اوصوت حجلك تيه اعليه اللكيتك
مالكيتك
شنهو انته
انته تعتومه عصاري
انته بعجود اليشوفن من عرفته
انته شبكه عاشكين بحجي سكته
انته اليداويلي جرحي وانته علته

وراح اكلك شنهي انته
من رسمتك
قلم اسود
ورق ابيض
جرت الحمره اعله شفته
اوعذرتك بس شطبته
هذا انته
او عرفتك من رسمته

سيد ضياء الصافي
_________________

فقرة
( انسان مثقف شاعر )
لليوم الخامس المصادف يوم الأربعاء 2020/1/22
معنا في فقرة اليوم شاعر مبدع جدا من مواليد 1990
من سكنة قضاء الحي محافظة واسط
كتب الشعر الفعلي والحقيقي عام 2010
أنا وانتم احبتي والشاعر المبدع
علي الركابي
...............
كلت اسافر
اجمع امتاعي غربتي
والم لوني
واغبش استنكي السمار
اليرهم لطولي حرير
...وكلت اشوف السنبله ...التضحك بكاعي
وين ماعند الله خير
وقررت ...باجر أطير
بدائرت انحطيت والتمت بروحي النايحه
وصرت مثل الجايعه الباعت ضناهه البارحه
وماتت بروحي الاشواك البارحه
وبسجن عيني وتجاعيدي البوجهي
غير دمعاتي الحزينه ولا ملامح طافحه
وكلت اسافر
وانه اعيش بديره تنبض رازقي
بس مو لبنهه..... للغريب
ديره بيهه اليكبر يذبوه تتن
وانه عايش مثل البروحه بقت صرخت وطن
والمناجل ...واهليه انطشت بروس الحصاد
والكناطر ....وزعوهه امراد ...لولاد الرماد
رويحتي .....ناعور ماضاك السكي
والناس ...عاد
كلت اسافر
ولالكيت ابنادم يلمني اعله كدي
ولالكت عشتار كلكامش بحزني وحلم وردي
كلهه ضدي
انه ضدي
لانهد يضحك لشفتي ولاكلاده تصيحني
ولأنه مستوطن بذاتي ولاحبيب يريحني
دورت روحي لكيت الناس ديره تايهين
وكلت اسافر
والمحطات الخذت وجهي اعله نيتك
شيعت بيه الحنين
وصنطه وامتاع الغريب تصير دمعه
وحشه واخر امل بين اعيوني جاهل
جايع وياكل باصبعه
ياحزن ...اي يارفيجي الخاطرك
متت وكفه وكلهه سلهه لخاطرك
ولاتغيب
وحتى لو رايد تروح
شما تغيب ولا يهمك ناطرك
كلت اسافر
وين ماعند الله ديره تموت من ينام جايع
توزع الفرحه مناير
عافيه
وخير الجوامع
ديره مابيهه سبي
ديره كل عصفور قران ونبي
ديره تنبض. بالتواضع
ماكو ماي يشيل خشمه اعله الشجر
الطين رب
يطوف بعيون النهر
الغيم مرجوحت صور
وكلت اسافر
وين ماعند الله لوني
وين ماعطش واصوم وافطر بجامع اعيوني
وين ما تنساب روحي تغبش بزفت اضنوني
ومن تنام
السما بروحي
كلت اسافر
علي الركابي
______________________
فقرة
( انسان مثقف شاعر )
لليوم السادس يوم الاحد المصادف 2020/1/26
شاعر شاب مبدع من جنوب العراق ولد عام 1998
في منطقة خور الزبير محافظة البصرة
كتب الشعر الفعلي عام 2015
أنا وأنتم احبتي والشاعر المبدع جدا
عبدالله بريسم
………………………
(عرس الذبح)
السيده رمله عليها السلام تحاكي ولدها القاسم عليه السلام
ماشي وين
خاف ضيك يطفه لونه وتشرب اعيونك شمس
وماشي وين
خاف ضلمتهم تلمك وينطفي ابدمك ضوه اشموع العرس
الحنه البچفك نشيد
ابيا حزن رايد تضيع
اللمعه لبعينك شذر
مو وكت موتك يضي توك جديد
توه جستك بالظلوع اگدار يوم
ولليكرهوك السدر
وين اضمك من ذبحهم
اسيوفهم تهوه الرگاب البيها لذه
ونحرك مغازل فجر
بعدك ازغير تدنه ابحضني نام اشوالمك ويه الرمح
طيحتك چويه اعله عمري
يالذيذ ابطعم ابوك
ياهو منكم ما كله اشفافه العطش
ياهو منكم ما غفه وفاگدله راس
وكبر ابروحه الهظم ليل اهدعش
يلخذت كلشي اويه موتك
يلشتلتك ويه شيبي اگدار ترچيه اتشلبه ويه النسيم
اتغازل اطراف الزلف
يلعگب عينك ضعت والطف چبير
وهي بس عينك عرف
منين اشمك والسهام ابصدر الگرنفل توضت
ليش عرسك واهليه من الدمه
يا توابيت التلمك
وادري المغيسل چبير وما يلوگ وانت شاب
توني عشت اللچمه لتمر بالسمه لو گمر غاب
عگبك الفرحه ضباب
وين اروحن والسياط اتريد حيل اجدام تركض
وين ما اديرن گفاي ابوجهي اشوف السوط يعرض
ياعزيز اسوالفي المحد حچاها
يلچنت بيك استراح من السنين
ياهو مثلك سهّر الليل بصلاته
ياهو مثلك وجها ماي والعطش تارس لهاته
چانت اجروف السبيل اتفيض منك
ماخذتني من السبي وحرگ الخيام
ماخذتني ابصفك اتمدد وانام
ياكبر ذنبه الغفه وكاتل امام
الشاعر
عبدالله بريسم
________________________
فقرة
( انسان مثقف شاعر )
لليوم السابع يوم الأربعاء المصادف 2020/1/29
شاعر شاب من مواليد 1982 ولد في منطقة الظوالم
من محافظة السماوه كتب الشعر الفعلي عام 2005
انا وانتم والشاعر المبدع
ابراهيم عبد الرضا

-وضمني ..
-يم زيجك مثل ضَم العجايز..
وادمك علمها فتوه ...
-(هيه كشمرة العشگ مرغوب جايز...)

-وهوه مضمام العجايز للحرص...
-وخلني يم گنطار صدرك...
-وأنته تدري ...
-هيه ألعثوگ الترطب تنگرص...

-ياشتل روحي ...
-تعال ...
-أبكل طريق ألگاني خله..
-خاطر أسد بشبگتك كل نقص..

-وهيج علمني...
-من أشوفك...
-ليش بالحسرات أغص...!!؟

-ليش من يحچون بأسمك...
-تصعد لراسي رجفتي...
-وأنطش أتراب أعله سچة تايهين...؟

-وأنه چم مرة سألتك...
-عود ربك من رسم أية جمالك...
-هم أجه يم باله طين..!؟

-عود ليش ...
-أخدودك التنگط ترافة...
-چن سحر بالغ حدوده...؟

-وفوگ هذا ويشهد الله
-چه شلتلك شامة سوده..!!

-بينت كعبة جمالك
-چم دهر بيهه أنه أطوف...

-أصفن
-أگبالك وأغازل.....
-خصّر ...
-بنت الغجر ذيج....
-ألتلمح ينزلون بالزفة الدفوف...!

-وأطلق لشَعرك عنانه...
-أنه أول مرة أشوفن ...
-للشَعر يطلع لسانه..
-وظل يسولف ..
-ظل يسولف...

-وطحنه يم زلفك سكارى
-وأنته يالتاكل بروحك...
-چنك أطباع الجكارة...

-وأحنه ناكل بالأصابع هيج حسرة...
-لخاطر الله مرني طيف ...
-وخلني يم شفتك أفسره

الشاعر
ابراهيم عبدالرضا
_________________
فقرة
( انسان مثقف شاعر )
لليوم الثامن يوم الأحد المصادف 2020/2/2
معنا اليوم في هذه الفقرة شاعر من مواليد 1978
من ناحية النيل محافظة بابل ( الحله )
انا وانتم والشاعر المبدع
. محمد لفته العماري

مدري…
شچان يدور….ابالي
گاعد وحدي
ب نص الليل
وقررت اكتب نص …..سريالي…!!!!
حشمت
ال اااااخ ال ب السدره
وجمعت
ال شجره اعله…الشجره
وصحت العصفور ال عالشجره
الگاعد
جان ب عش أيجار وگتله…اقرالي…!!!!
ضل ساكت
ساعه
ولن يبچي
دمعات من ال جوع…تلالي
ضل يبچي
وانه اسمع وابچي وگتله…اقرالي…!!!!
شقرالك
باگو…بستاني
لو اقرالك
مامش ماي بهاي الساجه
مامش ماي ب ذيج الساجه
لو..
بلبل چي غنه استشهد
ماجان يغني بساعتها
جان يأبن بلبل……ثاني……!!!
وضل…يقرالي
((((لو دره
البلبل بواچيه غنه
يبلع لسانه…ويموت))))
مات
البلبل
مات العصفور اليقرالي
وضل البيت براسي يدور
يدور
يدور
وضليت اصرخ الله الله…(الشباني)..!!!
مدري شچان
يدور ابالي
گاعد وحدي بنص الليل
وع النجمه
ال طاحت لل گاع
دزيت
(هلال)…وچم…(طارش)…!!!
رجعولي
بدم يابس توه
قرطاسيه
وسيل اوراق
بيهن دفتر كلش بايد
دفتر من حقبة..…گلگامش…!!!
عفت الدم
وعفت ال كلشي
وگلبت ب دفتر…گلگامش
وهنا
جانت اكبر صدمه
مامش كل طاري ل انكيدو
لا ب جلاد
لا بين سطوره التعبانه
لا
ب الاهداء الممسوح ولا… ب الهامش…!!
يمكن
مالحگ ع العشبه
لويمكن چانت مسمومه
لحگت
اقره ب اخر صفحه
مات الكون بحادث غامض
ماتت
عندي السرياليه
الناوي اكتبها
ب نص مجنون
مات (هلال) ومات…ال (طارش)
اتلفت
لن ميت كلشي
كلكامش
وانكيدو
وسدره…!!!
والعصفور
الگتله… اقرالي
ميته ال شجره
وفي ال شجره…!!!
وانه
وباب الحوش…الخالي
ميت…كلش
ميت
من انه ابطن امي
ميت
لاچن
گاعد وحدي بنص الليل
ومدري شچان يدور……ابالي….!!!!!

محمد لفته العماري
________________
فقرة
( انسان مثقف شاعر )
لليوم التاسع يوم الاربعاء المصادف 2020/2/5
معنا في هذه الفقرة شاعر مبدع من مواليد 1979
من منطقة كنعان محافظة ديالى
انا وانتم احبتي والشاعر المبدع
هيثم القيسي
…………………
ماادريك
طبع البيك خلك اجروف
سترهن من يشبكن ماي شيله الطوف
طبكة جفني حيلة نوم
نطرت الطيف
طعم صياد بجفوني الدمع خليت
هم ماجيت
يعيرني بسماره الليل
من يحضن شمس يصفون
لون غروب
صير الكاع
اجيك جنازه كلي ذنوب
غزرته الموت
كل برزخ شبكته عتاب
اشما طول بعد مافتح باب حساب
اشحلاته العوز
براس الفقره بس احلام
وجهي انباك
نص عمره اليعيشه ايتيم
موش اولام بزر الترف خلي يصير
صفنتي وماتعيش الراح
نكرت الطيب
وانه بكلشي الك رديتماالكاك
اردن وين العناكب صيدها المتعوب
على وجه الشمس ما صح
خيال الناس
اثاريه
يظل محسوب بوكة ليل
انه ادري
حلات النسمة غفوة طير
مو نزت جروح أفراك من خلان
ملج موت الضوه لوجس
جفن حلمان
النهر لومات
تلكه بذمته دم غركان
الكمرة تغيض
كلمن ضم دغش للباب
وانه مغثتي الهندس
عمر سهران
يبركع بالنجم طاريك بيه انجاب
الضميره اغياب
بشرع كل دين موش انسان
الهوه حاجوز
بطلابة رماد يصير
اشكثر مبخوت
وامنته اعله سرك نار
ضميمي اوشال وتكضني الغيره فشلة عار
شسولف بيك
اشيلم حجاية الدخان
التاه بشوك
للصورة يرد نيشان
صوت الباب
صلاة اجفوف
نية الضيف حجي الشباج
حلال بحضرة لوبسجون
وحرام ابيت
حت لو يكضي شوف اعيون
وانه مفرهدصلافه ومستحاي ايبور
بدرب ممشاك
اشكثر يستاحش الدفان
ادفن بي
حسرتي واعثر بتابوت
الشاعر
هيثم القيسي
______________________
فقرة
( انسان مثقف شاعر )
الفقرة العاشرة ليوم الأحد المصادف 2020/2/9
معنا في هذه الفقرة
شاعر لهُ باع في الشعر من مواليد 1975 من حي العسكري
محافظة كربلاء المقدسة
كتب الشعر الفعلي عام 1997
انا وانتم احبتي والشاعر المبدع
مرتضى السعيدي
(عتب حار )
خيط شوفك
يلضم
باول آمرآية
ومن يموت يموت
صوت
ودين دمك
من يطوف
اجناحة بحلوگ
المرافي
يرتجف
طين السكوت...
وانت تدري
العمر اعمه
مايميز
بين سلطان
المدينة
وبين
نسمات الشواطي
الغابشة بلسان
دجلة
الشمة ضلوع
المناجل
گبل لاتبدي روازين
الحصاد....
وحلمي شط
مشكاة
بصفاح اليسار
وبيه زاقورة
حزن
حلت شعرها
وطير لابس ثوب
عش
و قافية ميت
بحرها..
واكو كبالي حروف
كلش باشطات
من يذكرن هورشيمه
يخففن بالدم حبرهن
ولو عرگ فهرس
لفظهن
بالكتب نشرب
اثرها...
يم عرش ربك
قوافي تنشتل
ماتنزرع
وتنسگي عنبر
ملوحة
ماي من بير
الضلع
وترسم صيت
بملامح مستواي
وجرح مشكاة
القوافي
غيم مشدود
بسماي...
وفرفحتهن وحده
وحده
ماثبت عندي
الدليل
على الاحواط سولفتهن..
من عطش بيه الخيال
باب ثدي المستحيل
وغسلت دمع
الگصص
من حلمي مات
وچفنيته بمدرسة
ماي الحياة..
وكبرت انجوم المناجل
والعطر سهلم عصاري
وضحكن اوزان الشوارب
من خذيت بقلمي ثاري
وانتهت صرخه شعوري
بسامري صيت البراري
وديني اتوضه بقسمتي
وصله الغبشة بسماري
وانه شايل نبي
شاعر
لابس احزام
المحنه
ويشرب اذنوب
الحصار
نبي شاعر يفتهم
علم العروض
ويرتمس باقرب
قرار
نبي مالات الله
عنده
مايخاف امن
العذاب
نبي شاعر
يكتب الشعر المغصن
لو شعرهم عنده ثار
نبي شاعر
كون كاتب ( ياحريمة)
(ويمه ذوله اهل القصر
مالاعبوني)
نبي شاعر كون كاتب
(وين چنتي)
(ولوتصاحب خوش صاحب)
والرعب طيب للمدينة
( وانه اريدن رب عراقي )
نبي شاعر
كون يندل الرساله
الغفة بيها العنكبوت
وما يجامل اي حمامه
عاشت ابصيت النبي
#الشاعر_مرتضى_السعيدي
_______________
فقرة
( انسان مثقف شاعر )
لليوم الحادي عشر يوم الاربعاء المصادف 2020/2/12
معنا في هذه الفقره شاعر شاب
من مواليد 2000
من الحي العسكري محافظة العماره
كتب الشعر الفعلي عام 2016
انا وانت والشاعر الشاب
مصطفى غالب
……………… ..
كود بـيـه الـخيـط اذا مـو بـبـره تـايـه ..
كـود بـيـه الـطيـر مـن يجهـبله غربـه ايـصيـر شـايـه ..
وانـه تـايـه مـن اهـد مــا كتلي وينـك !!
منـهد مـا طـاحت الكـذله ع عيــنك ''
......ـ
ااخ يـاضـحكـت سنـيني بـيـوم بـان وطـلع سنـك
ااخ يـاذيـج الـرسالـه الفـززتـني ومـوش مـنك
وانه تانيت الرسايل
مثل واحد كاعد ويترجه طـيف
جاشحطلهه الرساله العايزه اسمك
جاشحط لحروفهه وتكدر تلجمك
كـودني وشدني ع بالـك
يا اعز مكروه بعيوني واحبك
يا الذ نعوت فجايد
كضني وقراني ع كيفك ماكبر عمر الجرايد
ضمني موش الركب مضمام الكلايد
ضام روحك مني موتدري البخور اشمايضم
روحه احترك ويطش رماده
امس مدري شمالني وبلليل رتك
وفكدت العريس للماجا فكدتك
جاونه اشجندوب ادورك
وركضت المطكوك اخو ركضن سنيني
ولا انته ولاطيفك ايمر ع عيني
كلبي جيب اثكال ماشاف الرخيص الماينفعه
ونته كلبك طيف باجر مادريت اشضاملي
وانه بس توصل رساله بسرعه اكول احتاملي
لاتخلي الغربه تشلبه ع كلبي وبوكني انته
وجوز من بوك الملامح ذنب محصول اليحوف
يابعد ذيج الرساله الكوه كتبتهه الجفوف
ويابعدني
ويابعد كل ناسي اليكلولي احبك
ضيعتني اهواي شوما انسه رسمك
وانه امس تيهت اخوي وكتله شسمك
وامس كلبت ابرسايلنه العتيجه وحده كايل راح اجيك
انطارة المطلوب ع يفزع نطرتك
يافشلتي اشكد قديمات الرسايل ونتضرتك
الشاعر
مصطفی غالب
_______________________________
فقرة
( انسان مثقف شاعر )
ليوم الاحد المصادف 2020/2/23
معنا في هذه الفقرة
شاعر من مواليد 1985 من مدينة الرمادي
محافظة الأنبار
كتب الشعر الفعلي عام 2009
احبتي الكرام
أنا وانتم والشاعر المبدع
احمد ابراهيم العبيدي
القصه عثره ....
الشخص طلّتّ الگمر
والتراتيل التجيني تسيس بجرفي الهچع
اذكر الوقت إلي چان
چان ثنتين وعشگ
الدرب كله سواجي .....
الحب اداة إتّطلع اسرار النبض
مصطلح حب العيون
ناجح بذاك الزمان الماشفت بي اي دغش ..
الهمس بلفطره چان…
مو كرم
شفه ولمس
الموعد بلايه ولف سهوة امام
وينمحي بموعد جديد
القبله بستان الصديق الماخذة منه ورد ...
الكحل رايه….
الكلمن ايقود الجيوش بحملة الماعدنه قسمه
النده رايه....
الكلمن ايقود الجيوش الجمع راسين بمخده .
الضمير المايأنب صاحبه ماهو ضمير
والحبيب…
الما گعد ولفه وكت آذان گلبه
هذا ما ظنّه حبيب
ينادي قد حان التلاقي
إصحوا
يلا
إصحوا
يلا
عاشقين ..
حان موعد وقت تطهير القلوب .
الصلاة بجامع السوك القديم
شكد نظيف اركان هذا الجامع المليان شوگ
البي فتو كل حب مقدس ....
والخيانه…
إتكون بُدعه
يجب تفعيل القصاص
على كل من يُوجد بجفه صفار ....
وصدرو فتوه جديده
الي يلزم خائن يكافئ گلب متروس طعنّه ..
الصفنه جِزيه
وتندفع حصرالمن مره اشتياق ....
الدمعه مُهره
وكفر تنزل يم شخص مايسوه ذره
الشاعر
احمد ابراهيم العبيدي
____________________
فقرة
إنسان مثقف شاعر
ليوم الأربعاء المصادف 2020/2/26
معنا في هذه الفقرة شاعر ولد في ناحية القيارة
محافظة الموصل عام 1993
كتب الشعر عام 2016
انا وانتم احبتي والشاعر الشاب
محمود السميط
............
ياذونه ونرد يمهم
يادنيه اشملذ همهم
أشكثر ملكاهم يتعب
ولا يشبه رسايلهم
ورجعت اركض مثل شوفي
ركضت إعله الصور حافي
ماريدآ وجه لليل ...
سواد كلوبهم كافي
وشفتهم...
من مشوا مارجفوا إعله البوب
ومن يمها وعرفت الفركه...
دين الفارغين كلوب
وخذوني علل ذنب والكاس
وبديت أخمر وتيه الناس
انا ابن أدم غنوة ألياس
اي ياكلبي كتلك شوف
طحنه ومالكينه جفوف
من نطشر تلمنه
هاي الناس مو منه
احنه اشما حجو عنه
نضل مرسال للحِنه
نضل بيبان للجنه
ياكلبي العتب شيفيد
كافي بحزنك مجلب
ماضاكوا حسرتك من يجي المغرب
من تختنك وحدك والدمع يكتب
من داروا كفاهم مشوا مايدرون
كفه البيبان بعيون اليحب مُذنب
ورغم هذا ارد اشتاك لصورهم
ياذونه ونرد يمهم
يادنيه اشملذ همهم
اشكثر ملكاهم يتعب ولا يشبه رسايلهم
الشاعر
محمود السميط
______________________________